Fundacion CORESA ta participa pa gana $10,000

Vota Awo

Fundacion CORESA, Aruba su prome y unico fundacion bringando diariamente contra cancer di tripa, ta anuncia su participacion den Wind Creek Aruba su Long Table Video Contest. Durante e evento anual, 4 fundacion local lo ricibi un donacion di $10,000 cada uno.

Fundacionnan local a haya e oportunidad di entrega un video cu ta demonstra nan metanan y plan pa e fondonan, y cuminsando 23 di mei, pueblo di Aruba por vota pa e fundacion cu nan ta pensa ta mas merecido di un donacion di $10,000.

Fundacion CORESA ta orguyoso di presenta su video anima, unda por mira claramente e rol importante cu e fundacion tin riba nos isla. E video ta splica cu cancer di tripa ta un di e tiponan di cancer mas comun na Aruba, kico bo por haci pa tuma accion, y con Fundacion CORESA lo haci uzo di cualkier donacion cu nan ricibi.

Den e ultimo añanan, Aruba a mira un aumento drastico den e casonan di cancer di tripa, y nos ta mira cu e edad averahe di esnan afecta ta keda bira mas y mas jong. A bira momento pa tuma accion y cuminsa cu e lucha contra e malesa aki cu ta afecta nos sernan keri. Cu solamente 1 screening, dokter por detecta bo nivel di riesgo y cuminsa cu tratamiento pa prevencion. Pero e realidad ta cu e proceso di screening na Aruba no ta optimal, y esaki ta e cambio di mas grandi cu Fundacion CORESA lo atende cun'e.

E fundacion tin e meta pa inverti den aparatonan mas adecua pa detecta e potencial di cancer di tripa. Pero Fundacion CORESA no lo stop eynan; e siguiente obhetivonan ta pa revoluciona e sistema den su totalidad door di implementa strategianan pa segura cu tur ciudadano den risico haci nan screenings regularmente, y conscientisa nos pueblo pa por reconoce sintomanan potencial di cancer di tripa. E meta di mas grandi ta pa wak un Aruba sin cancer di tripa.

Como un fundacion relativamente nobo, cualkier ayudo lo tin un impacto sumamente grandi. Nos ta pidi pa bo sosten y bo apoyo door di VOTA pa Fundacion CORESA den e Long Table Video Contest. Bishita https://www.wishpond.com/lp/2744353/entries/202404782 pa vota, y confirma via e-mail pa bo voto wordo segura.

Vota Awo